Книгите

Петнаесетгодишниот Бјорн живее во школото за јавање во Западен Јуланд со двајцата браќа и со депресивната мајка. Бјорн се бори со својата хомосексуалност што ја чува во тајност и со деструктивните мисли, така што посегнува по себеси. Кога Бјорн се вљубува во дваесет години повозрасниот учител по јавање, се развива чудна и садомазохистичка љубовна приказна, која има далекосежни последици.

Исклучителниот јазик и гласот во романот го наведоа данското жири на Европската награда за литература, како и данските критичари и читатели од сите возрасти, да бидат целосно обземени од овој дебитантски роман. Идиосинкратската, а сепак сигурна проза и поезија е дива, непречена и им пркоси на сите табуа.

„Градината од стакло" е билдунгсроман за едно девојче сирак, кое ќе успее во животот. Една Русинка ја посвојува Ласточка од сиропиталиште и ја принудува да собира празни шишиња и да ги мие, во еден двор на чуда во Кишинев во осумдесеттите години на минатиот век, каде што рускиот и романскиот јазик се континуирано предизвикани од секакви животни приказни.

Приказната на Ласточка содржи неколку теми: потрага по идентитет, станување жена и мајка, заедно со интензивна оркестрација на чувствителноста и огорченоста и на љубовта и омразата. Елиптично и страсно, творештвото на Татјана Цибуљак е за потрагата по нашето место во светот.

Што ако во вашиот живот одненадеж се отвори празнина? Ова е прашањето што Лаура Фројденталер го поставува во нејзиниот втор роман „Приказна за духовите".

Во годината кога Ана прави пауза од академскиот живот, всушност, целосно си ја нарушува рамнотежата. Една по една ги напушта своите навики и хобија. Преку ден талка по улиците, а навечер во бележникот си запишува што забележала. Станот во кој живее заедно со Томас веќе 20 години го чувствува сè потуѓ и непријатен. Долго време се сомнева дека тој ја изневерува, а девојката — што Ана ја смета за негова љубовница — се појавува како попатен дух што шепоти.

Расказите „Почитувани бубачки…" раскажуваат за апсурдноста на постоењето, поврзано со безмилосниот капитализам, со протагонисти кои се обидуваат да го зачуваат своето достоинство додека претаат како бубачки, а понекогаш буквално се распукуваат.

Збирката брои 12 раскази на повеќе теми. Една стара тетка на умирање одлучува да го понесе мобилниот во гробот. Раскажувачка чита рекламни слогани од ИКЕА на сопругот на смртна постела. Девојка го отвора плакарот на мајка си за да најде „дневник на трошоци" за ИБЕЈ. Сите дванаесет раскази се приказни во кои животот и смртта се испреплетуваат со смеата, солзите во очите и грутката во грлото.

„Лекција за месечарот" е фикционализирана автобиографија во која авторот се враќа во своето детство, одново создавајќи го минатото врз основа на сеќавањата и на фантазиите.

Едно момче опседнато со слабеење ги поминува бескрајните летни одмори во домот на баба и дедо — култната „зелена куќа". Во зелената куќа има огромна библиотека, некогаш сопственост на прадедото, кој за време на животот се зближил со познатиот португалски писател Фернандо Песоа. Момчето се впушта во авантура на себеоткривање, од милите патувања со мајката до конфликтниот период на егзистенцијално преиспитување во студентскиот дом.

Нилс, млад човек на околу 30 години, си го одзема животот. Низ анегдоти, навидум тривијални настани и спомени, неговата сестра ја раскажува приказната за семејството пред и по Нилс.

Тоа е приказна за момче кое веќе било осаменик како дете, млад човек кој никогаш не го нашол своето место во општеството, во образованието, на работа или меѓу пријателите. Мајката на Нилс и неговите браќа и сестри се обидуваат да најдат начин да живеат по Нилс, така што приказната на романот се разделува на три многу различни патеки што треба да се следат.